Ils emprems fastitgs dalla pleiv romontscha da Vuorz derivan ord igl 8avel tschentaner (testament da Tello, 765), denton pertuccava ei aunc la baselgia da s. Gieri a Munt s.
Gieri. La baselgia parochiala el vitg „Vorce“ ei vegnida baghegiada egl 11avel tschentaner. L’entschatta dils onns 1530 ei la pleiv da Vuorz sedecidida per la reformaziun sut
l’influenza da Johannes Cunzin (Continus). Dapi lu ha Vuorz adina giu in agen plevon. Dapi 150 onns ei Vuorz ligiaus fermamein culla pleiv da Schnaus, dapi 2017 era cun
Glion.
La baselgia, dedicada a s. Desiderius e s. Leodegar, gioga ina impurtonta rolla per la veta da cuminonza el vischinadi da Vuorz. Enconuschenta eis ella surtut era pervia dils
maletgs unics dil meister da Vuorz.